तोअम्बा, क्विन्सल्याण्ड। बिगत केही समयदेखि बिदेशमा बस्ने नेपालीहरुले आफ्नो कला र ज्ञानले नेपालको शिर उच्च राखेको प्रमाणहरु धेरै छन् । अस्ट्रेलियामा पनि नेपाली मूलका फोटोग्राफर सरोज पन्त उत्कृष्ट फोटोग्राफीका कारण चर्चा कमाउँदै छन् ।
विशेष गरेर बन्यजन्तु र प्रकृति फोटोग्राफीमा अब्बल सरोज पन्तले बिगत ११ बर्ष अघिदेखि यो बिचित्रको महादेश अस्ट्रेलियाका सुन्दर तस्विरहरु आफ्नो क्यमरामा कैद गरिरहेका छन् ।
क्विन्सल्याण्ड राज्यको तोअम्बा ग्रामिण शहरमा बस्दै आएका पन्तले २०१९ सालमा खिचेको एक फोटोले स्थानिय समुदायमा निकै चर्चा पायो । अस्ट्रेलियाको स्थानिय प्रजातिको सुगा जस्तै देखिने “रेन्बो लोरकिट” चराको जोडीलाई “इन्द्रेणी प्रेम” बिम्बको रुपमा पन्तले फोटो फ्रेममा प्रस्तुत गरेका थिए । तस्विरमा मुटु आकारमा अंगालो मारेर बसेका यी इन्द्रेणी रङका दुई चराले माया, स्नेह, सम्बेदना र हेरचाहको विश्वलाई संदेश दिएका छन् ।
युनिभर्सिटी अफ साउदर्न क्विन्सल्याण्डले पन्तको उक्त फोटो नेपाली समुदायको सौगातको रुपमा आफ्नो केन्द्रिय कार्यालयमा राख्ने भएको छ । स्थानिय तोअम्बा नेपाली समुदायको तर्फबाट उक्त फोटो बिश्वबिद्यालयका उप कुलपति प्रफेसर जेराल्डिन मेकेन्जिलाई हस्तान्तरण गरिएको थियो ।
कार्यक्रममा उक्त बिश्वबिद्यालयमा कार्यरत नेपाली मूलका प्रोफेसर टेक मरासिनीको पनि उपस्थिती रहेको थियो । जुलाई २९ बुधवार विश्वविद्यालले आयोजना गरेको “तस्वीर हस्तान्तरण” कार्यक्रममा पन्तले गौरवमय तरीकाले नेपाली राष्ट्रीय पोशाकमा सजीएर आफ्ना्े उत्कृष्ट सिर्जना बिश्वबिद्यालयका उप कुलपतिलाई हस्तान्तरण गरेका थिए । बिश्वबिद्यालयको सभा कक्षमा पन्तको तस्विरलाई राखिने भएको छ ।
पन्त भन्छन्, “वन्यजन्तुको तस्वीर हामीले हेर्दा जति सुन्दर हुन्छ त्यसलाई क्यामारामा कैद गर्न त्यती नै कठीन छ । मैले कुनै तस्वीर लिनलाई हप्तौ दिन लगाएको छु ।” स्वअध्यनबाटै फोटोग्राफीका सीपहरु सिकेका पन्तको मूल घर नेपालको गोर्खा जिल्ला हो । उनी सपरिवार ११ बर्ष देखि क्विन्सल्याण्डमा बस्दै आएका छन् ।
आगामी बर्ष तुअम्बा काउन्सिल र युनिभर्सिटी अफ साउदर्न क्विन्सल्याण्डसँग मिलेर बन्यजन्तु र प्रकृतिको बारेमा फोटो प्रदर्शनी गर्ने योजना रहेका पन्तले नेप्लिज अस्ट्रेलियनलाई बताए ।
पन्तले स्थानिय तोअम्बा नेपाली समुदायमा हुने खेलकुद, नेपाली भाषा कक्षा, स्थानिय बहुसाँस्कृतिक कार्यक्रमहरुमा स्वयमसेवी भएर फोटो खिच्दै आएका छन् ।
