गैरआवासीय नेपाली संघ एनआरएनले, नेपाल सरकारले शुरु गरेको कोरोना संक्रमणका कारण विश्वभर समस्यामा परेका नेपालीलाई घर फर्काउने अभियानमा सक्दो सहजीकरण गर्ने जनाएको छ ।
नेपाल सरकारसँग विभिन्न चरणमा गरेको वार्ता र छलफलपछि कोरोना संक्रमणको बेला विदेशमा रहेका नेपालीलाई स्वदेश फर्काउन सफलता मिलेको भन्दै एनआएनएले सरकारी प्रयासप्रति खुसी व्यक्त गरेको छ ।
संघले, नेपालीलाई तत्काल स्वदेश फर्काउनका लागि उपप्रधानमन्त्री ईश्वर पोखरेल र परराष्ट्रमन्त्री प्रदीपकुमार ज्ञवालीसँग पटक पटक छलफल गरेको एनआरएन, कोभिड १९ उच्चस्तरीय समितिका प्रेस संयोजक चिरन शर्माले जानकारी दिए ।
सरकारले आजबाट विदेशमा समस्यामा परेका नेपाली स्वदेश फर्काउन सुरु गर्ने घोषणा गरेसंगै संघले आफ्ना सबै शाखाहरुलाई नेपालीहरुको फिर्तिको लागि सहयोग गर्न तयारी अवस्थामा राखिएको जनाएको छ ।
पहिलो चरणमा म्यानमारबाट २६ र युएईबाट २ सय ५० नेपालीहरु फर्काउने तयारी गरिएको गैरआवासीय नेपाली संघ एनआरएनएले जानकारी दिएको छ।
