अकल्याण्ड । न्युजिल्याण्ड नेपाल सोसाइटीले स्थापनाको २५ औ बार्षिकउत्सव मनाएको छ । गएको २५ जुलाईमा अकल्याण्ड सहरका मेयर फिल गोफले रजत महोत्सव समारोहको उद्घाटन गरेका थिए ।
कार्यक्रमलाई संबोधन गर्दै मेयर फिल गोफलले न्युजिल्याण्डमा नेपाली संस्कृति र भाषालाई जीवन्त राख्न नेपाली समुदायकोे प्रयासको सराहना गरेका थिए । “तेञ्जिङ शेर्पा र एडमण्ड हिलारीले सगरमाथा आरोहण गरेकाले मात्रै भन्दा पनि त्यस पश्चात् हिलारीले नेपाल र नेपालीसँग कायम राखेको निकटताले न्युजिल्याण्ड र नेपालबीच पृथक एवं आत्मीय सम्बन्ध रहेको छ” मेयर फिलले बताए ।
हाल अस्ट्रेलियाको मेलवर्न निवासि जोग प्रसाद लिम्बूको अध्यक्षता र सर एडमन्ड हिलारीको संरक्षणमा इस्वी १९९५ मा स्थापित यो संस्था न्युजिल्याण्डको सबैभन्दा पुरानो र क्रियाशील सामुदायिक संस्था हो ।
सोसाइटीको रजत महोत्सव समारोहमा अन्य अतिथिहरु न्युजिल्याण्डका सासंदहरु मेलिसा ली, प्रियांका राधाकृष्णन, डा. परमजीत परमार तथा नेपालका लागि कन्सुलर पिटर गिब्सले आफ्नो शुभकामना मन्तब्य राखेका थिए । उनीहरूले दुई देशबीचको सम्बन्धलाई निरन्तर प्रगाढ बनाउन तथा न्युजिल्यान्डको साँस्कृतिक विविधतामा नेपालको पनि उल्लेख्य स्थान रहेको बिचार व्यक्त गरेका थिए ।
सर एडमन्ड हिलारी निधनपछि सोसाइटीको संरक्षकको भूमिकामा रहेकी लेडी जून हिलारीले न्युजिल्याण्डमा नेपाली समुदायलाई अभिभावकत्व प्रदान गरेकोमा विशेष समारोहमा सम्मान गरिएको थियो ।
प्रमुख अतिथि फिल गोफ, संरक्षक जुन हिलारी तथा संस्थाका अध्यक्ष डा.सन्तोष भण्डारीले भूतपूर्व कार्यकारी पदाधिकारी एवं सदस्यहरूलाई उहाँहरुको योगदानका लागि प्रमाणपत्रले सम्मान गरेका थिए । कार्यक्रममा भर्खरै जस्टिस अफ पिसको रुपमा नियुक्ति पाएका पूव अध्यक्ष दिनश खड्कालाई बधाई दिईएको थियो ।
कार्यक्रममा संस्थाका अध्यक्ष डा भण्डारीले सम्पूर्ण सहभागीहरुलाई स्वातग गरेका थिए भने मुना ढकालले कार्यक्रम सञ्चालन गरेकी थिइन । कार्यक्रममा १५० भन्दा धेरै नेपालीहरुको सहभागिता रहेको थियो ।
