प्रमुख प्रतिपक्षी दल नेपाली काँग्रेसले, भारतले, नेपाली भूमी लिपुलेक हुँदै चीनको तिब्बतमा रहेको धार्मिकस्थल मानसरोवर जाने सडक मार्ग खोलेपछि सरकारको धारणा मागेको छ ।
शुक्रबार काँग्रेस प्रवक्ता विश्वप्रकाश शर्माले ट्वीटरमा प्रधानमन्त्रीलाई मेन्सन गरी भारतले नेपाली भूमी लिपुलेक हुदै बनाएको सडक मार्गबारे सरकारको धारणा माग गरेका छन् । प्रवक्ता शर्माले ट्वीटरमा ’लिपुलेक नेपालको भुमि हो, हामी प्रष्ट छौं । चीनको मानसरोवर जोड्न भारत सरकारले लिपुलेक हुँदै सडक उद्घाटन गरेको समाचार बारे नेपाल सरकारको धारणा चाहन्छौं भनेका छन् ।
त्यस्तै सत्तारुढ दल नेपाल कम्युनिष्ट पार्टी नेकपाका नेता भिम रावलले, ट्वीट मार्फत सडक निर्माण भएर संचालनमा आउदाँसम्म कसरी सरकारलाई थाहा भएन भन्दै सरकारको धारणा मागेका छन् । ट्वीटरमा उनले मातृभूमी र जनताको सुरक्षा गर्नु सरकारको दायित्व भएको स्मरण गराउँदै भारत सडक निर्माण गरेको घटना प्रति दुःख व्यक्त गरेका छन् ।
यता, राष्ट्रिय प्रजातन्त्र पार्टीका अध्यक्ष कमल थापाले, नेपाली भुमी हुदै भारतले चिनसम्म सडक बाटो संचालन गरेको विषयमा अविलम्ब आवश्यक कदम चाल्न नेपाल सरकारसँग माग गरेका छन् । शुक्रबार ट्विट गर्दै उनले नेपाली भूमि लिम्पियाधुरा र लिपुलेकमा रहेका भारतीय सेना फिर्ताको सट्टा लिपुलेकसम्म बाटो बनाई यातायातका निमित्त खोलिएको घटनाको विरोध गरेका छन् ।
यसअघि, सो सडकको आज भारतका रक्षामन्त्री राजनाथ सिंहले दिल्लीबाट भिडियो कन्फरेन्समार्फत उद्घाटन गरेका थिए ।
