क्यानबेरा । अस्ट्रेलियाले देशव्यापी रुपमा खोप लगाउने तयारी गरिरहदा कोरोना भाइरसको फाइजर खोप अस्ट्रेलिया आइपुगेको स्वास्थ्य मन्त्री ग्रेग हन्टले जनाएका छन् ।
युरोपबाट गतराती नै १ लाख ५२ हजार डोज खोप आइपुगेको तथा फेब्रुअरी २२ तारिखबाट जनतालाई खोप लगाउने कार्यक्रम तय भएको छ ।
“खोप लगाउनु अघि सुरक्षा र खोपको गुणस्तरीयतालाई सुनिश्चित गरिने छ खासगरी हवाई जहाजमा ल्याउदा तापक्रमलाई यथावत राखिएको छ छैन भन्ने निश्चित गरिने छ तथा आममानिसमा कुनै नोक्सानी नहुने कुरालाई पनि सुनिश्चित गरिनेछ,” मन्त्री हन्टले भने ।
खोपलाई माइनस ६० डिग्री तथा माइनस ९० डिग्री सेल्सियसमा राखिएको थियो ।
सरकारले खोपको ८० हजार डोज आउदो हप्ता हस्तान्तरण गरिनेछ जसमध्ये ४० हजार राज्य तथा क्षेत्रहरुका होटल क्वारेन्टाइनमा फ्रन्टलाईनमा कार्यरत तथा स्वास्थ्यकर्मीहरुलाई प्रदान गरिनेछ भने ३० हजार डोज एज्ड केयर र डिसाविलिटी केयरमा बसोबास गर्ने तथा त्यहाँ कार्यरत कर्मचारीहरुलाई प्रदान गरिनेछ ।
स्वास्थ्य मन्त्री हन्टका अनुसार जनसंख्याको आधारमा राज्यहरुलाई खोप उपलब्ध गराइनेछ ।
गत हप्ता नै प्रधानमन्त्री स्कट मरिसनले थप १० मिलियन फाइजर खोप सुनिश्चित भइसकेको जुन जम्मा २० मिलियन पुगेको घोषणा गरेका थिए ।
स्वास्थ्य मन्त्री हन्टले यसै महिनाको अन्त्यसम्ममा ६० हजार डोज प्रदान गरिनेछ जुन तालिका भन्दा केही अघि नै हुने बताए ।
युरोपेली संघले कोभिड—१९ को खोपलाई लिएर नयाँ नियम ल्याएपछि अस्ट्रेलियाले फाइजर खोप प्राप्त गर्ने वा नगर्नेप्रति चासो बढेको थियो ।
तर गत हप्ता नै अस्ट्रेलियाका लागि युरोपेली संघका राजदूतले खोप अस्ट्रेलिया पठाइने बताएका थिए ।
फाइजर खोपलाई देशव्यापी रुपमा लगाइने कुरालाई दोस्रो विश्वयुद्धपछि कै ठूलो लजिस्टीक चुनौतीको रुपमा लिइएको छ ।
मन्त्री हन्टका अनुसार थेरापेउटीक गुड्स एडमिनिस्ट्रेसनले अक्सफोर्ड-अस्ट्राजेनेका खोपलाई मान्यता दिए खोपको उत्पादन अस्ट्रेलियामै गरिने छ ।
