सिड्नी । नेपाली बिद्यार्थी बिसिका घिमिरेले न्यु साउथ राज्यको शिक्षा मन्त्रालयले प्रदान गर्ने प्रतिष्ठित मिनिस्टर अवार्ड प्राप्त गरेकी छिन् । सिड्नीको पश्चिम गिरावीन हाई स्कुलमा कक्षा १२ मा अध्ययनरत घिमिरेले उत्कृष्ट शैक्षिक नतिजाका हासिल गरे बापत यो पुरस्कार प्राप्त गरेको विद्यालयले जनाएको छ ।
विद्यालयका प्रिन्सिपलले सामाजिक संजालमा फोटो सार्वजनिक गर्दै उपाधि पाउने बिद्यार्थीहरुलाई बधाइ दिएका थिए । गिरावीन हाइ स्कुल न्यु साउथ राज्यको उत्कृष्ट बिस भित्र पर्ने सेलेक्टिभ स्कुल हो ।
बिसिका घिमिरे विद्यालयको भाइस क्याप्टेन पनि हुन् भने उनी फुटबल खेलमा रूची राख्छिन् । साथै स्थानिय ब्लाकटाउन काउन्सिल र ब्लाकटाउन नेप्लिज कम्युनिटीले आयोजना गरेको कार्यक्रममा उनले साँस्कृतिक नृत्यहरू प्रस्तुत गरेकी थिइन । बिश्वबिद्यालय गएरर मेडिकल बिषय पढ्ने योजना रहेको घिमिरेले नेप्लिज अस्ट्रेलियनलाई सुनाइन् ।
सात बर्षको उमेरमा सन् २०१० मा बिसिका घिमिरेले अस्ट्रेलिया आएकी हुन् । उनले कक्षा २ देखि अस्ट्रेलियाको विद्यालय शिक्षा शुरू गरेकी हुन् ।
बुबा सिताराम घिमिरेका अनुसार बिसिकाको सानैदेखि अध्ययन र खेलकुदमा रूची थियो । “छोरीको अध्ययन र अतिरिक्त कृयाकलापमा सहयोग होस भनेर आफुहरूले सँधै उनलाइ साथ दिएका छौ ।” बुबा घिमिरेले भने, “मेहनेत त छोरीले नै गरेकी हुन हामीले मात्र वातावरण बनाउने हो ।”
राज्यको शिक्षा बिभागले बिशेषा कार्यक्रम गरेर अर्को शैक्षिक टर्ममा यो पुरस्कार बितरण गर्ने जनाएको छ ।
अध्ययन, खेलकुद, नेतृत्व सीप, विद्यालय परिवारमा खेलेको भुमिकाको साथै मेहनेति, मिलनसार, जिम्मेवार, सहयोगी, सहभागिमुलक र दयालु जस्ता विशेषाताको अधारमा विद्यालयले यो पुरस्कारको लागि सिफारिस वा मनोनयन गर्दछ ।
