स्थानीय तहको चुनाव आगामी जेठ ४ गते एकैचरणमा हुने भएको छ ।
प्रधानमन्त्री शेरबहादुर देउवा र निर्वाचन आयोगका प्रमुख निर्वाचन आयुक्त दिनेश थपलिया नेतृत्वको टोलीबीच भएको छलफलमा जेठ ४ गते एकैचरणमा चुनाव गर्ने सहमति जुटेको हो ।
छलफलपछि प्रधानमन्त्री देउवाले एकैचरणमा चुनाव गर्ने गरी तयारी थाल्न आयोगलाई निर्देशन दिएका छन् ।
प्रधानमन्त्रीनिवास बालुवाटारमा मंगलवार दिउँसो ३ बजे निर्वाचन आयोगका पदाधिकारीले प्रधानमन्त्री देउवासँग स्थानीय तह निर्वाचनबारे छलफल गरेका थिए ।
निर्वाचन आयोगले जेठ ५ अगाडि नै चुनाव गर्नु उपयुक्त हुने सल्लाह दिएको थियो ।
सत्तारूढ ५ दलीय गठबन्धनले जेठ महिनाभरमा निर्वाचन गर्ने गरी मिति तोक्न सकारलाई सुझाव दिने निर्णय गरेको थियो ।
यसअघि निर्वाचन आयोगले वैशाख १४ र २२ गतेको मिति प्रस्ताव गरेको थियो ।
गठबन्धनले निर्वाचन कानून संशोधन गरेर मात्रै स्थानीय तहको निर्वाचन गर्ने सहमति गरेको छ । गठबन्धनमा रहेका नेकपा माओवादी केन्द्र र नेकपा एकीकृत समाजवादीले निर्वाचन केही समय पर सार्ने प्रयास गरेका थिए ।
तर चौतर्फी दबाबका कारण उनीहरू जेठ महिनाभित्र स्थानीय तहको निर्वाचन गर्न सहमत भएका थिए ।
