काठमाडौँ, नेपाल । नेपालमा कोरोना भाइरस कोभिड—१९ को संक्रमणबाट ज्यान गुमाउनेको संख्या दुइसय नाघेको छ ।
शनिबार एकैदिन १२ जनाको मृत्यु भएसंगै नेपालमा कोरोनाका कारण ज्यान गुमाउनेको संख्या २ सय ७ पुगेको स्वास्थ्य तथा जनसंख्या मन्त्रालयले जनाएको छ ।
स्वास्थ्य तथा जनसंख्या मन्त्रालयका अनुसार शनिबार उपत्यकाका तीन जिल्लामा मात्र ६ जनाको मृत्यु भएको छ ।
काठमाडौं, ललितपुर र भक्तपुरका २—२ जनाको मृत्यु भएको हो ।
यस्तै पर्साका २ जना, पाल्पा, सिराहा, गोरखा र कास्कीका एकएक जनाको मृत्यु भएको छ ।
यस्तै नेपालमा कोरोना संक्रमितको कुल संख्या ३७ हजार ३ सय ४० पुगेको छ।
नेपालमा पछिल्लो २४ घण्टामा थप ८८४ जनामा कोरोना भाइरसको संक्रमण पुष्टि भएको छ।
पछिल्लो २४ घण्टामा ११ हजार ५ सय १६ पीसीआर परीक्षण गरिएको छ योसंगै नेपालमा ६ लाख ६९ हजार ६२६ जनाको पीसीआर परीक्षण भएको छ।
स्वास्थ्य मन्त्रालयका अनुसार शनिबार ३१३ जना कोरोना संक्रमित डिस्चार्ज भएका छन्। यससँगै हालसम्म डिस्चार्ज हुनेको संख्या २० जार ५ सय ५५ पुगेको छ।
हाल सक्रिय संक्रमित १६ हजार ५ सय ७८ रहेको मन्त्रालयले जनाएको छ।
काठमाडौँ उपत्यकामा थप १८६ जनामा कोरोना पुष्टि भएको छ।
काठमाडौँ उपत्यकामा पछिल्लो २४ घन्टामा १८६ जना नयाँ संक्रमित भेटिएका छन्।
काठमाडौँमा १५५, भक्तपुरमा १२ र ललितपुरमा १९ जनामा कोरोना संक्रमण देखिएको स्वास्थ्य मन्त्रालयको नियमित स्वास्थ्य अपडेटका क्रममा प्रवक्ता डा. जागेश्वर गौतमले जानकारी दिएका हुन्।
