डार्विन । कोरोना भाईरसका कारण अन्तर्राष्ट्रिय सिमाना बन्द भएयता अस्ट्रेलियामा पहिलो पटक अन्तर्राष्ट्रिय विद्यार्थीको आगमन भएको छ । सिंगापुरबाट ६३ जना विद्यार्थी बोकेको सिल्क एयरको चाटर्ड बिमान सोमबार डार्विनमा अवतरण गरेको हो ।
उक्त समूहमा चीन, हंङकङ, जापान, भियतनाम र इन्डोनेसियाका विद्यार्थीहरु रहेका छन् । मार्च २० तारिखपछि पहिलो पटक अस्ट्रेलिया पुगेका उक्त अन्तर्राष्ट्रिय विद्यार्थीहरु होवार्ड स्प्रीङ रहेको क्वारेन्टाइनमा १४ दिन बस्नेछन् । उनीहरुले चाल्र्स डार्विन विश्वविद्यालयमा अध्ययन गर्नेछन् ।
उक्त क्वारेन्टाइनमा चीनको वुहानबाट उद्धार गरिएका कोरोना भाइरस संक्रमित अस्ट्रेलिया नागरिक तथा डायमण्ड प्रिन्सेस जहाजबाट उद्धार गरिएकाहरुलाई राखिएको थियो ।
डार्विनमा ७० जनासम्म विद्यार्थी ल्याउन नदर्न टेरिटरी सरकारले संघीय सरकार र चाल्स डार्विन विश्वविद्यालयसंग सम्झौता गरेको थियो ।
अस्ट्रेलिया आएका विद्यार्थीहरुले उडान भन्दा ७२ घण्टा अघि नै कोरोनाभाइरस परिक्षणमा नेगेटिभ भएको प्रमाणति गर्नुपर्ने थियो ।
विद्यार्थीहरुले विमान चार्टरको रकम तथा विश्वविद्यालयले क्वारेन्टाइनको खर्च व्यहोर्नुपर्नेछ ।
यसै वर्षको सुरुवातमा एसिटी र संघीय सरकारले पाइलट प्रोग्राम अन्तर्गत अध्ययनरत ३५० विद्यार्थीलाई अस्ट्रेलिया ल्याउने योजना बनाएको थियो तर मेलवर्नमा कोरोना भाइरसको दोस्रो लहर सुरु भएपछि उक्त योजनामा ढिलाई भएको छ ।
त्यसैगरी, अगस्टमा साउथ अस्ट्रेलियामा तीन सय विद्यार्थी ल्याउने योजना सार्वजनिक भएको थियो ।
यता चाल्र्स डार्विन विश्वविद्यालयले विद्यार्थी ल्याउन सफल भएको कार्यलाई एक उपलब्धीको रुपमा लिइएको छ ।
विष्लेषकहरुले भने सन् २०२१ को अन्त्यसम्म सिमानाका बन्द रहे अस्ट्रेलियाका विश्वविद्यालयले १९ विलियन डलरको घाटा व्यहोर्ने जनाएका छन् ।
याे पनि पढ्नुहाेस् ।
अस्ट्रेलियामा दुई महिनामा पाँचजना फुड डेलिभरी राईडरको निधन; सरकारले बनायो टाक्स फोर्स
