काठमाडौं– प्रधानमन्त्री शेरबहादुर देउवाले प्रतिनिधि सभामा विश्वासको मत जितेका छन् । प्रतिनिधि सभाको आइतवार बसेको बैठकमा भएको मत विभाजनमा देउवाको पक्षमा १६५ सांसदले मतदान गरेका थिए । नेपाली कांग्रेस, माओवादी केन्द्र, एमालेको माधव नेपाल पक्ष र जसपाको समर्थनमा देउवाले प्रतिनिधि सभामा सुविधा जनक बहुमत पाएका छन् ।
देउवाले प्रतिनिधि सभामा विश्वासको मत पाएसँगै प्रतिनिधि सभाले आफ्नो पूरै कार्यकाल पूरा गर्ने बलियो आधार देखिएको छ । संविधानको धारा ७६ (५)को प्रधानमन्त्रीले विश्वासको मत पाउन नसकेको अवस्थामा प्रतिनिधि सभा फेरि विघटनमा जाने खतरा थियो ।
अब प्रतिनिधि सभाले बाँकी १६ महिनाको कार्यकाल पूरा गर्ने संकेत देखिएको छ । २०७४ मंसिरमा प्रतिनिधि सभाको निर्वाचन भएको थियो । प्रतिनिधि सभाको कार्यकाल पाँच वर्षको हुने भएकोले आगामी २०७९ मंसिरमा अनिवार्य रुपले प्रतिनिधि सभाको चुनाव गर्नुपर्नेछ ।
देउवाको पक्षमा माधव नेपाल समूह मात्र नभइ एमालेको केपी ओली समूहका सांसदले समेत मतदान गरेका छन् । ओली सरकारमा वन मन्त्रीको जिम्मेवारी सम्हालेका प्रेम आले लगायत उनी पक्षीय सांसदले समेत देउवालाई भोट हालेका छन् ।
नेता नेपालले राजनीतिक स्थायित्वका लागि आफूहरुले देउवालाई भोट हालेको बताएका छन् । ‘यो संसदले स्थायित्व दिन सक्दैन भनिएको थियो, आज स्थायित्व दिएर प्रमाणित गरिदिएको छ । सर्वोच्चको फैसलाको उचित कार्यान्वय नभएको छ । निरंकुश प्रवृत्तिमाथि अंकुश लागेको छ, लोकतन्त्र र संविधानको जित हो’ नेपालले भने ।
प्रतिनिधि सभाले बाँकी १६ महिनाको कार्यकाल पूरा गर्ने देखिएपछि अन्तिम समयमा जसपाको महन्थ ठाकुर पक्षले पनि देउवालाई भोट दिएका छन् । यसअघि महन्थ ठाकुरले प्रतिनिधि सभा विघटन गर्ने निवर्तमान प्रधानमन्त्री केपी शर्मा ओलीको कदमलाई साथ दिएका थिए ।
विश्वासको मत लिएलगत्तै प्रधानमन्त्री देउवाले मन्त्रिपरिषद् विस्तारको काम अगाडि बढाउने भएका छन् ।
ग्रेटर सिड्नीमा अत्यावश्यक बाहेकका सेवाहरु शनिवार मध्यरात देखि बन्द हुने
