अष्ट्रेलियाका नयाँ प्रधानमन्त्री एन्थनी अल्बानीजले चीनसँगको सम्बन्ध ‘अप्ठ्यारो स्थितिमा’ रहने बताएका छन् । क्वाड देशको बैठकमा भाग लिन टोकियो प्रस्थान गर्नुअघि उनले यस्तो अभिव्यक्ति दिएका हुन् ।
क्वाड समूहका शीर्ष नेताहरु अष्ट्रेलिया, भारत, जापान र अमेरिकाको बैठक टोकियोमा हुने भएको छ ।
समाचार एजेन्सी रोयटर्सका अनुसार अल्बानीजले भने, ‘चीन परिवर्तन भएको छ, अष्ट्रेलिया होइन र अष्ट्रेलियाले सधैं आफ्नो मूल्यमान्यताको सम्मान गरेको छ र मेरो अगुवाइको सरकारमा पनि यो जारी रहनेछ ।’
अष्ट्रेलिया र चीनबीच व्यापार, कोरोनाको उत्पति, प्यसिफिक क्षेत्रमा चीनको बढ्दो प्रभाव र क्षेत्रीय सुरक्षा लगायत धेरै विषयमा विवाद हुँदा दुई देशबीचको सम्बन्ध तनावपूर्ण रहेको छ । लेबर सरकारले अष्ट्रेलिया र चीनबीचमा सुधार ल्याउने अपेक्षा गरिएको छ ।
अल्बानीज अष्ट्रेलियाको ३१ औं प्रधानमन्त्री बनेका छन् । स्कट मोरिसनलाई हराएर उनी अष्ट्रेलियाको नयाँ प्रधानमन्त्री बनेका हुन् ।
