होबार्ट । अस्ट्रेलियाको संघीय सरकारले ल्याएको १.२ विलियन डलर बराबरको पर्यटन कार्यक्रम अन्तर्गत अप्रिलदेखि यात्रुहरुले होबार्टको लागि ५० प्रतिशत छुटको हवाई टिकेट खरिद गर्न सक्ने भएका छन् ।
संघीय सरकारले यसै हप्ता आधा रकमको ८ लाख टिकेट उपलब्ध गराउने घोषणा गरेको थियो । सुरुवाती चरणमा सरकारले सो छुटका लागि १३ वटा स्थानलाई चयन गरेको थियो जसमा बर्नी, डेभनपोर्ट र लनसेस्टन परेपनि होबार्ट भने छुटेको थियो ।
तर थप छलफल पछि होबार्ट पनि सो सूचीमा परेको संघीय सरकारले जनाएको छ । यसको अर्थ यात्रुहरुले तास्मानियाको विभिन्न स्थानहरुमा छुटमा यात्रा गर्न सक्नेछन् ।
एक वक्तव्यमार्फत उपप्रधानमन्त्री माईकल म्याककोरम्याकले यस कदमलाई होवार्ट र त्यस वरिपरीको समुदायका लागि ठूलो जीत भएको बताए ।
यस अघि सार्वजनिक भएको सूचीमा होवार्ट नपरेपछि दक्षिणी तास्मानियाका पर्यटन व्यवसायीहरु निरास भएका थिए ।
उद्योग विकास सहायक मन्त्री जोनाथन डुनियमले सरकारले सुन्नुका साथै तास्मानियाका लागि सकारात्मक उपलब्धीका लागि सहमत भएको जनाए ।
सूचीमा होबार्टलाई पनि समावेश गर्नुले दक्षिण क्षेत्र तथा राजधानी आसपासका पर्यटकिय क्षेत्रहरु पुर्नउथानमा सहभागी हुन सक्ने अपेक्षा गरिएको छ ।
डार्विन र एडिलेडलाई पनि सो सूचीमा थप गरिएको छ । क्वीन्सल्याण्ड अर्को राज्य हो जहाँ तास्मानिया जतिकै संख्यामा स्थानहरु छुटको यात्राका लागि छनौटमा परेको छ ।
छुटको टिकेट अप्रिलको सुरुवात देखि जुलाईको अन्त्यसम्म खरिद गर्न सकिनेछ र सो सेप्टेम्बर अन्त्यसम्म यात्राका लागि हुनेछ ।
तर सरकारले भने उडानहरु, मार्ग तथा टिकेटको संख्या मागमा आधारित हुने तथा यसका विमान कम्पनीसंगको छलफल पछि टुंगो लगाइने जनाएको छ ।
अर्थतन्त्र उकास्न आन्तरिक पर्यटन प्रवर्द्धन गर्दै अस्ट्रेलिया; हवाई भाडामा ५० प्रतिशत छुट
